الصورة لريسنا حسني مبارك مع الموزز الأمريكاني الأسمر الجديد اوباما، اعتقد انه واضح انا عايز اقول ايه من الصوره شويه… من الواضح ان حسني وصل لمرحلة من العجز و التقدم في السن غير مسبوقه للإنسانية، انا مش هتريق خالص عن المنظر اللي اشبه بالأموات الأحياء -zombies-دا طبيعي لشخص عنده 82 سنه و بيعيش بالحقن و الأدوية الخاصه -كما تذكر الاساطير الشعبية في الشارع المصري- لتجعل وجهه مبقى على جلده… انا بجد مش هقول يسقط يسقط ولا يصعد يصعد ولا همارس ايا من قلة ادب الشعب اللي مترباش دي انا اخاطبه بشكل اكثر جديّه، هل من الممكن ان بلد زي مصر يا ريس يحكمها و يتحكم في لقمة عيش اهاليها مسن عمره 82 سنه تضرب الشيخوخة بعصاها على رأسه كل صباح؟!!! مصر مهياش دوله صغيره احنا 85 مليون مصري و أكثر -طبعا هو تلاقيه لسه فاكرنا 70 مليون لأن مخه توقف عن الإدراك من 10 سنين-، انا خطابي دلوقتي لكل محبي النظام لكل شباب الوطني و لكل مريدي مبارك حول مصر -وانا اناديهم بأسمائهم بأدب على غير العادة- مصر بلد ينفع يحكمها مسن عمره 82 سنه؟؟؟

بالرجوع للأطباء و للإحصائيات المتعلقه بصحة الأفراد، انه متوسط عمر الأنسان على كوكبنا بينخفض يعني بينزل لمتوسط ال55 سنه لمدى التدهور البيئي اللي عايشين فيه و اللي بيأثر بالسلب على اعضاء الإنسان، خلينا نقول ان مبارك خارق للعاده وراجل رياضي و بيهزها كل يوم عشان يجري الدوره الدمويه جوا جسمه، من المستحيل ان تقود القدرة العقلية لمخ سيادته وهو 82 سنه هي القدرة الكافية لإدراك الخطأ من الصح لو لم تكن لإدراك من حوله، انا مش بتكلم عن فساد مبارك و عشان كدا مش بقول يسقط مبارك انا بتكلم عن حاجه طبيعيه انت عجّزت يا حسني بلغت من السن عتيا و اصبحت غير صالح لحكم مصر ولا لحكم قرية من قرى الصعيد واللي هي مش على الخريطة بص لنفسك في المراية و قول كفايه كدا علي و عيشلك السنه ولا الأتنين اللي باقين من عمرك مع حفيدك اللي فاضلك و مع جمي و ديجه يمكن ربنا ينفخ في صورته و يعرف يجيبلك عيل تلعب فيه.