يوم الجمعه اللي فات انا كنت مع القافله الشعبيه اللي نظمتها اللجنة الشعبية لدعم الشعب الفلسطيني, القافلة كان مخطط لها الوصول لرفح و الإعتصام هناك حتى فتح المعبر, دعما للشعب الفلسطيني و رفضاً مننا للحصار اللي بيفرضه الكيان الصهيوني بمساعدة عمالة النظام المصري. طبعاً انا واحد من الناس مكنتش متوقع ان امن الدوله يسيبنا نوصل ابعد من بوابات الإسماعيليه, ولكن الأمن سبنا ندخل سيناء و نعدّي بوابه ورا بوابه ورا كمبن ورا نقطه عشان بفاجئنا قبل العريش بـ 20 كم بكمين من قوات الأمن المركزي و حوالي 8 عربات ترحيلات في الوقت اللي كنا فيه منهكين و جعانين بعد يوم طويل اعتصمنا فيه اربع مرات عشان نقدر نوصل للنقطه اللي امن الدوله يكون مستنينا فيها بالقوات دي و ميديناش حتى فرصة المناقشه او على الأقل الإحتكاك بالأمن. فقط لف و ارجع تاني مع حراسه من الداخليه رافقتنا لحاد القاهرة تقريباً!!

القافله دي مكانتش بتمثل لي فقط فرصه للتضامن مع الشعب الفلسطيني على أرض الواقع او التعبير عن رفض قرارات النظام المصري اللي في الأصل مش معترف بيه!!, لكنها بالنسبه لي كانت فرصه عشان اتعرف على سيناء, مش اول مره ازور سيناء روحت شارم الشيخ قبل كدا لكن اول مره احس اني داخل سيناء, يمكن عشان طريقنا بيقطع عرض سيناء, مش هتكلم عن اللي حسيت بيه و انا داخل سيناء اللي دفع تمنها الآلاف من رجالة البلد من دمهم و أرواحهم عشان لو اتكلمت دلوقتي مش هنطق غير بالشتيمه و السب و اللعن على أوسخ من انجبت ارض مصر وهو انور السادات, يمكن اتكلم بعدين عن سيناء و حصارها!!

انا بقى مش مؤمن بحاجه اسمها السيادة المصرية مع شعب بيربطك بيه علاقات تاريخية و ثقافية و عرقية, يعني مفيش اي مبرر لقفل معبر رفح قدام الفلسطنيين بأي شكل من الأشكال, حتى لو هناك تخوف من نزوح عدد من الفلسطينيين لمصر و الإقامة فيها, اعتقد انهم اولى من الملايين من السودانيين و الأفارقه اللاجئيين في مصر و إن كان لا مجال للمقارنه مين اولى من مين, انا فقط مؤمن بالسيادة الشعبية, و انا معتقدش ابدا ان الشعب المصري فقرائه قبل اثريائه ممكن يفكروا مرتين قبل التحرك لمساندة الشعب الفلسطيني مش لأي إعتبارات دينية او عرقية غير اننا منقدرش نشوف شعب محتاج و نتفرج عليه بيموت زي مابيحصل دلوقتي!!!

الصورة تصوير: جاسمن بيومي