البُكا زي الضحك… الضحك هو الحركة الي بتقوم بها الشفايف على دراجات بيصاحبها صوت و يمكن دموع في شدتها و ايا كان شكلها فهي طريقة التعبير الجسديه عن الفرح، البكا هو رد الفعل الطبيعي من غدة الدمع بالعين للتعبير عن الحزن او الضيق… التعريفات السابقة مش تعريفات علمية او اي شئ دا مجرد تعريفي للحالتين و اللي بنستنتج منهم ان الضحك زي البُكا وسيلتين للتعبير ولكن الضحك مش عيب انما البُكا عيب!!
بعتقد انه من اكبر اسباب تحول الذكور في مصر للتصرف بذكورية مرفوضة ضد اناث هو اسلوب تربيته –واللي بيكون على ايد اول انثى بحياته وهي امه- فبيتزرع جواه حجات كتير قوي مابين انه راجل البيت لكونه المسؤول عن أخته لأهم حاجه بعاني منها وهي.. الراجل ميعيطش ميبكيش… الراجل عيب يبكي لأنه راجل ولا انت مش راجل؟!!
هو اليه الراجل مايبكيش؟ وإيه اللي هيحصل لو الراجل و اللي هو انسان بكى؟ دي كلها اسئله بطرحها على نفسي كتير و مع اول دمعه تزرف من عيني اقرر انه لازم اقفل بابي و اقفل النور عشان لا اشوف دمعي ولا اسمح انه حد يشوفني ببكي وخصوصا امي و اختي و اللي مرسوم جواي انه لو شافوني ببكي هكون تسونامي بيتنا مثلا!!!
مش كتير ببكي وبعتقد انه السبب هو انه الراجل عيب يبكي… كتير بحس اني عايز ابكي حقي كإنسان يعني بس مش ببكي لأنه انا راجل و الراجل مايبكيش!!! مره بكيت كتير و بصوت فكانت النتيجه انه لازم اكتم و محدش يسمع او يشوفني منهار لأني راجل و الراجل ماينفاعش ينهار…
مش فاهم ايه العلاقه و مش متوقع افهمها بس ابو ام الرجوله اللي تسلب الإنسان حقه في التعبير عن حزنه!!!