ايون الأنبياء لا يظهرون على شاشات اليوتيوب في امر واقع كدا زي كون الملائكه لا تشاهد الأفلام الإباحية*… ماهو اصل لو الدعوة للإيمان بربنا بقت 2.0 يبقى ربنا دا بيهزر الصراحة، الحكاية كلها على بعضها بالنسبالي تحولت لفيلم كوميدي -اصل انا بقيت بحوّل اي حاجه تبضنّي إلى موقف كوميدي عشان اضحك بدل ما اعيط- و بذكر الكوميديا مقدرش اسكت عن ذكر حبيبي الكوميدي الأكبر الرئيس المؤمن!!!

بص شوف العدرا بتعمل ايه!!… هو دا كان هتاف الناس قدام الكنيسة لما طلعتلهم اللمبه الفروسنت اللي حركت مشاعرهم نحو الثالوث المقدس من جديد لتنير قلوبهم بالإيمان و تطيل بالهم على البلوى ايا كانت ايه هي، مبدأيا انا لو ياسمين حمدان ظهرتلي على لمبه فروسنت مش هقف اهتفلها بص شوف العدرا بتعمل ايه.. فمابالك بالعدرا اللي هي عدرا؟!!…

انا مش متحمس لفكرة اني اقعد احلل ميتافيزيقية الضوء الساطع فوق قبة الكنيسة و الذي هو ترائي للعدرا كما قالوا يعني ميهمنيش اني انكر او اثبت دا بس هو مش العدرا  طلعت الساعه واحده الصبح؟ وهو الساعة واحده الصبح في الشتا بيكون في جمهور في الكنيسه بيعمل ايه؟ دا وسط البلد بتكون فاضيه من الساعة 12!!! مش عارف بس حبيت قوي فكرة انه العدره من الساعة واحده لتلاته الصبح تترائى تنور و تطفي زي حسناء المولد و حط اللمبه على وركه ينور على جسمه ينور…

الأحلى بقى هو الجولة اللي اخدتها في اليوتيوب بعد فيديو ظهور العدرا، فعلاً لكلٍِ ليلاه اللي ليلاه بتنور في الضلمه و اللي ليلاه منقوشه… فتلاقي السلمين –السنه- يظهر شيخ من شيوخهم على احد القنوات شايل حبّة لب و يكاد يبقى من فرط الإيمان و التأثر وهو يظهر “لا إله إلا الله” محفورة على قشرة اللبة، و الشيعة في يوم كربلاء يصورون واحد من المحتفليين ويقولوا انه الإمام عليّ، و الأحلى هو ظهور السيدة زينب من مقامها اللي في سوريا باب المقام يتفتح يطلع منه قماشه بيضاء فيهلل الجمهور!!! طيب انا ليه انا كمان معنديش حاجه بتنور و تطفي في الضلمه؟!!

تحديث: العدرا الآن تظهر من جديد بكنيسة بشبرا وفقا لمراسل برنامج 90 دقيقه اللي اتصل قائلا “معتز العدرا ظاهره يا معتز و شايفها بعنيا و الستات بتزغرد”!!!

*الملائكة لا تشاهد الأفلام الإباحية هو عنوان ديوان شعري لصديقي الشاعر المُلهِم طلال فيصل