مبارك.. متهالِك.. ممكن يعملها؟

مش حابب اكتب عن اللي بيحصل في ايران و اقعد انظر و اضيع وقت و مجهود في الخناق على إن كان اللي في ايران هو ثورة شعبية او حركة لمجموعة من الطبقيين ناس شايفاها كدا وناس شايفه كدا و انا مش مهتم بأي من الرأيين ولا اعتقد ان الشعب الإيراني نفسه اللي ماشي في الشارع بقاله اسبوع بأعداد مليونيه مهتم انه يعرف رأيي او تنظير غيري، وكذلك مش هكتب عن ماتش المنتخب مع البرازيل و اللي انتهي بالخسارة المكسب 4-3 بعد عرض معفن لحسن شحاته و المنتخب قدام منتخب الجزائر في الأدوار التأهيلية لكأس العالم مش عشان انا اصلا مش بحب الكوره و مش مهتم إن روحنا كاس العالم او روحنا آخر عمرة ولكن لأن الحدثين دول كانوا هما مدار حديث و اهتمام كل الناس في الأسبوع اللي فات في الفضاء السيبري بمختلف مساحاته، في الوقت اللي انا شايف فيه ان البلد في وضع حرج و مخيف جداً!!!

من حوالي 8 ايام طلع مبارك في لقاء مع التليفزيون المصري وهو في حالة اكثر من مزرية وبشكل فاق توقعاتي عن تمكن الشيخوخة و المرض منه، اللقاء اللي مدته كانت تقريبا 30 دقيقة و اللي محدش قدر يفهم منه معلومة واحده او رسالة يوجهها مبارك للشعب غير انه طالع يقولنا انه عايش و غيابة عن استقبال اوباما في المطار مش لأنه مش قاجر يتحرك، مبارك ظهر في حالة غاية في التدني تركيز منعدم، تنفس سريع و غير منتظم غير جلد وجهه اللي وضح عليه العجز و الزمن، المشهد مكانش مضحك لظهورة بالحالة دي بالعكس و غباء شديد من الإدارة اللي بتفكرله -مبا ان حالته دي لا توحي ابدا بأن به عقل قادر على اتخاذ قرار- انهم يظهروه على التليفزيون الرسمي بالحالة المزرية دي لأنه لو اثبت شئ فأثبت ان الشيخ البالغ من العمر 82 سنه واللي بيحكم مصر طوال اسود 28 سنة من تاريخها ما هو إلا مجرد جثمان ميت و غير قادر على التركيز في حديث تيلفزيوني لأكثر من 5 دقائق!!

المشهد مخيف جدا خصوصاً و انه في الأيام اللي فاتت بدأت تنتشر “إشاعة” او خبر غير مؤكد صحته عن رغبة مبارك في التنحي بعد انتهاء الأجازة البرلمانية و تشكيل المجلس الجديد، و المخيف في الأمر ان المطروحين على الساحة لخلافة مبارك هم عمر سليمان او الوريث جمال مبارك الوريث متوقع من فترة كبيرة اما عمر سليمان فظهورة بقوة في الصورة الدبلماسية مؤخرا بيخليه من المتوقع ان يكونوا من المرشحين للرئاسة في حالة التصديق بنسبية قوة خبر تنحي مبارك، و إن كانجمال او سليمان فمن العسكري للوريث يا قلبي لاتحزن، ولكن و إن صح خبر تنحي مبارك فبتمنى حاجتين يحصلوا… الأولى ان بعد تنحي مبارك عن الحكم و تحوله مواطن مصري يتم تقديم طلب للنائب العام بمحاكمته و محاسبته على 28 سنة من القهر لمصر، الثانية ان يكون في انتخابات بجد حتى ولو كانت نتيجتها ان العفريت هو اللي هيحكم البلد بس يكون العفريت دا جه بإختيار الناس بجد لأني مؤمن بمنطق بسيط “اللي بيجي بالديمقراطية بيمشي بالديمقراطية”، حابب اعلن تخوفي و اللي اعلنتقه مسبقاً قدام صديق عزيز علي قوي انه لو الإنتخابات سواء التالية لتنحي او إنتخابات الرئاسة القادمة لو مكانتش انتخابات بجد و تم تكويسها زي اللي سبقوها و الناس في الشارع ايضاً تقبلوها زي ماتقبلوا اللي سبقوها، موعدش نفسي ان رد فعلي هيكون إيجابي بأي شكل من الأشكال و ممكن يمتد بسلبيته لأني اسيب البلد لأني مش هقدر اعيش باقي حياتي تحت إحباط وقمع وريث او حاكم عسكري فاسد.