انا لسه راجع البيت من مستشفى حميات حلوان، قضيت هناك 3 ساعات عشان نكشف على اختي و اللي تعبانه بقاله اسبوع و دكاترة مصر المحروسه كل واحد فسر تعبها بشكر على هواه، اولا احب اقول اعتراف و نصيحه في نفس الوقت.. إن كنت مواطن مصري عايش على ارض مصر و تعبت اي نوع تعب او مرضت فمتروحش للدكاتره و ريح دماغك فهم مابين جهلة معدومي الخبرة او انصاف دكاتره و الأكثر منهم لايعلم عن التعقيم و النظافة الشخصية شئ!!!

اولا انا خلال الأسبوع اللي فات زرنا 3 دكاتره في وهم من الدكاتره المعروفين في المحيط السكني بتاعي، احب اقول و مع حالة الذعر المنتشره في البلد من انفلونزا الطيور و الخنازير مفيش دكتور منهم كان لابس جوانتي او كمامة!!! وكل واحد منهم فسر الحالة بطريقه مختلفة تماماً عن التاني يعني كل واحد منهم كشف و فسر اسباب التعب بطريقة مختلفة و كتب روشته مختلفه، قررت انهارده اننا لشدة و مع شدة القلق اننا نجرب زيارة لمستشفى الحميات، المستشفى من الخارج اشبه بالمقابر و شكلها مقبض جدا، من الداخل زيها زي كل مستشفيات الحكومية، تم قياس الحرارة قبل التوجه للدكتور و بعدين فوجأت ان الدكتور طلع كمامه جديده و جونتي جديد و لبسهم!!! ولما سألته عن اهتمامه بالكمامه الجديده قالي ان في 3 حالات انفلونزا طيور محجوزين و لازم يهتم، الدكتور كبير في السن يعني ممكن يكون دفعة السبعينات يعني لحق يتعلم طب بجدعلى ما اظن!!

مستشفى الحميات فيها 3 حالات انفلونزا طيور و في وقت انتظارنا نتيجة التحليل دخل علينا 3 حالات اخرى مصابين بأنفلونزا طيور طفلين و امهم، انا عايز افهم ايه الدور اللي بيقوم بيه حد زي وزير الصحة و فريق العمل اللي معاه بجد، مرض انفلونزا الطيور بيتم محاصرته في العالم كله إلا عندنا بينتشر اكتر، فقط مهتمين بدبح الخنازير و صرف الفلوس على دبحهم و دفنهم احياء و موجهين انظار الناس كلها لرهاب انفلونزا الخنازير ناسيين ان مصيبة انفلونزا الطيور لسه موجوده و بتنتشر بشكل  كبير!!!

حاجه اخيره عايز اقولها ان البلد دي فيها ناس تعبانه قوي قوي و محدش جمبهم اللي شوفته في مستشفى حميات حلوان تعب قلبي بجد، انا عارف ان انا عايش في محيط سكني مستواه ضعيف و ان الناس هنا تعبانه بس اللي شوفته فيهم انهارده كتيير قوي، الناس دي تعبانة في طحنة الحياة كفاية و مش مستحملين مجموعة من الدكاترة انصاف المتعلمين يقعدوا يجربوا فيهم زي فإران التجارب.