Communism is not dead by *pippuz

عشان تهزم عدوك لازم تكون عارف مين عدوك، مش عارف مين ممكن يكون العبقري اللي قال الجمله دي لأول مرة في تاريخ البشرية ولكن معتقدش انها محتاجه عبقرية سياسية إستراتيجية فذة، بإختصار تام و خصوصاً بعد المجزرة اللا إنسانية الإخيرة على اهل غزة لاحظت بشكل مستفذ إن الناس مش مفرّقه بين اليهود و الصهاينة، في بعض الكتابات في العالم الإفتراضي و في الشارع و مؤخراً على قناة إقرأ اللي شفتها صدفة و سمعت فيها شيخ ما معرفش و مش عايز اعرف مين هو “ما يفعله اليهود بأهل غزة…”، بعيد عن تخلّف قناة إقرأ و شيوخها و عشان أكون موضوعي مش هدخل في أسباب وجود مشكلة في التفرقة بين الصهيونية كحركة و بين اليهودية كديانة، لأن الأهم عندي هو توضيح الفارق بين اليهودية و الصهيونية عشان نعرف مين عدونا و مين ممكن نكسبه معانا في الدفاع عن قضيتنا.

اليهودية هي اول الديانات السماوية اللي نزلت على النبي موسى اثناء وجود بني إسرائيل في مصر، يعني اليهودية هي ديانة تأمر معتنقيها فقط بالتعبد و التوحيد، لم تأمر بالقتل او إبادة النساء و الأطفال او ذكر في اي نص من نصوصها ان اليهود هم جنس سامي عن البشر، يعني معندناش كمصريين او كفلسطينيين او كعرب او كبشر بشكل عام مع أي شخص يهودي طالما هو يبادلني نفس الإحترام لإنسانيتي ولا يعتدي على أرضي او أهلي. بالعكس دا في مجموعات من اليهود حول العالم اللي بترفض مجازر الكيان الصهيوني في فلسطين و بترفض اصلا كذبة الفكر الصهيوني و إحتلاله لأرض فلسطين.

الصهيونية هي حركة قومية يهودية أسسها ثيدور هتزل وهو صحفي يهودي نمساوي وعرف بأنه اول من إهتم بجمع شتات اليهود من اوروبا و دعوتهم للتفكير في تأسيس دولة يهودية و دا كان في الفتره ما بين 1895 إلى 1897 خصوصاُ و ان اليهود في الفترة دي كانوا بيعيشوا حالة شتات في اوروبا و المجتمع الأوروبي كان بيلفظهم لطبيعة عيشهم في مجتمعات مغلقة و إنشغال معظنهم في الربا و الدعارة و اللي اوروبا كانت بترفضه بإعتبارها كنيسة كاثوليكية، هتزل لاقى تأييد الكثير من يهود اوروبا و اللي كان بيمثلهم أمل في التخلص من العزلة و الإضطهاد العرقي اللي بيتعرضوا له وهو بدوره بدأ محادثات مع القيصر الألماني و الوالي العثماني و اللي رفضوا الفكرة بشدة –مع العلم انه لم يكن وقع الإختيار على ارض فلسطين بعد- ولكنهم تعاملوا مع هؤلاء اليهود معتنقي الفكر الصهيوني كعصابة، المهم بعدها و من انجلترا بدأت الإقتراحات تتوالى على مكان الأرض اللي ممكن تدعمهم بريطانيا للإنتقال إليها و تشكيل دولتهم فكانت اول الإقتراحات هي شرق أفريقيا –أوغاندا- و يذكر ان أحد الإقتراحات كانت الإرجنتين ولكنهم و بالصفقة البريطانية مع عصابات الصهاينة اتفقوا على ارض فلسطين اللي فيما بعد رسموا حوليها فكرة انها أرض الميعاد و تواجد الهيكل بأرضها و بدأت رحلة القتل و الذبح و التعامل على ان اليهود –من وجهة النظر الصهيونية- هم جنس أسمى من باقي البشر فهم الشعب المختار و باقي الأكذوبة المعروفه و اللي روج لها الصهاينة على مرور الأجيال، الصهاينة المغتصبين لأرض فلسطين و الداعمين لهم من انحاء العالم اجمع مع إختلاف دياناتهم هم العدو الحقيقي للإنسانية لأنهم مجرمي حرب قاتلي أطفال و نساء عزّل ممارسي إبادة عرقة ضد شعب يدافع عن الحق في الحياة.