انا اتسرقت مرتين في اقل من عشرة ايام الأول من اخبار الأدب و اللي بتصدر تبع أخبار اليوم٬ في يوم و انا في الشغل يدخل على بيسو حاملا العدد الجديد من الجريده و بيقولي بص على البضان بقى… امسك الجرنال الاقي المنظر التالي…
الجريده المحترمه واخده تصميم بتاعي كنت عامله لغلاف رواية ليسبو الصادره عن دار نشر ملامح٬ و الشخص الغير محترم اللي سرق التصميم بتاعي مش بس سرق التصميم منغير مايذكر اسم المصمم او انها غلاف للروايه لأ دا كمان عدّل فيه و مسح عنوان الروايه من على الغلاف و دي لا تسمى بأي إسم غير سرقه وسخه و فعلا موقف قذر من القائمين على الجريده او خلينا نقول اللي قام بتصميم الصفحه دي لحاد ما القائمين على الجريده يردوا على الإيميل اللي بعتهولهم.
السرقه التانيه بقى اللي حرقة دم من الطراز الأول٬ مودي راب مغني الراب اللي كنت نشرت له اغنيه من اغانيه قبل كدا وهو من الناس اللي بتعمل راب مصري حلو قوي و انا معجب بأغانيه٬ عرفت منه ان البومه الجديد موجود على موقعه امبارح و قالي ادخل بقى حمله و اسمع و قولي رأيك قولتله فل٬ ادخل بقى الاقي التصميم بتاع غلاف الألبوم هو التالي…
و اللي مسروق من تصميم التالي…
سألت مودي قالي انا مكنتش اعرف و اللي عامل التصميم واحد من اسكندريه جيبت ايميله و كلمته و بعد ما قولتله انت حرامي و سارق تصميمي رد فعله كان صادم قالي”سارق مين يا عم انت٬ انا دخلت على ديفيانت آرت ولاقيته و الناس بتحط الشغل على ديفيانت عشان يستخدموا تصميمات بعض و انا مسرقتش انا أخدته باك جروند بس و دي مافيهاش حاجه و بعدين لما انت مش عايز الناس تستخدمه بتحطه منغير واتر مارك ليه انت الغلطان مش انا”!!!!
طبعا طبعت بأكبر أحه و ختمت بشخره اهتزت لها جدران قلعة قايتباي بالأسكندريه –مع الإعتذار للرفيق مالك على التلفيات اللي أحدثتها في القلعه- يعني انا رافعها على حسابي و عامل حقوق الملكيه بعدم التعديل في التصميم فقط نشره و توزيعه في العالم الإفتراضي او مطبوع ولكن مع الحفاظ على إمضائي على التصميم و اللي بيكون موجود بحجم صغير في يمين التصميم. وبعد شوية كلام شرحتله يعني ايه ديفيانت آرت و يعني ايه مجتمع مصممين و الفرق بين اني ارفع تصميمي لنشره و بين اني اكون رافع صور ستوك مسموح بإستخدامها اعتذر عن غير اقتناع انه عامل مصيبه!!!
انا معنديش مشاكل ان الناس تعيد نشر تصميماتي منغير ماتذكر اسمي كمصمم يعني لو كان استخدم التصميم مع إبقاء إمضائي عليه مكنتش هزعل إنما يعمل اللي عملوه بتوع الأدب لأ كدا قلة أدب!!!
و يا ترى مين بقة مين الرسام اللى عامل اللاى أوت بتاع التصميم الاول ؟؟؟