انا برجع عن كل الكلام اللي انا قولته تحت و بالتالي بتراجع عن دعم فكرة ويكيبيديا مصريه٬ انا تحمست للفكره على اعتبار انها خطوه لترسيخ الأدب المصري و الشخصيه المصريه ولكن الحكايه كلها عن تعريف الشخصيه المصريه و ساعتها نقول تعريف اللغه او اللهجه المصريه٬ يعني المصريين دول اللي هما القاهريين و لا الصعايده ولا البدو و لا النوبه و لا الفلاحين و لا السواحليه؟٬ طيب مشروع ويكيبيديا مصريه كان بيعرف اللغه المصريه على انها اللغه اللي المصريين بيعرفوا يقروها طيب انهي مصريين اللي بينطقوا الألف جيم زي الصعايده ولا اللي بينطقوا الألف الف عادي زي القاهريين مثلا؟
واضح ان المزيج دا اصعب من ان يكون له لغه موحده تسمى بأسمه على رأي إحداهن “المصريين بعد 7000 سنه لسه معندهمش زي شعبي رسمي يبقى ازاي هيكون لهم لغه موحده”٬ المفاجأه اصلا بقى اني و انا بكتب كلامي عن ويكيبيديا مصريه لأتني بقول كلام زي “مرتع” و اللي كنت إنطباعي عنها انها كلمه مصريه و طلعت كلمه عربيه!!
———————————————————————————————-
لما عرفت بإعلان مشروع الويكيبيديا مصري انا فرحت جدا حسيت اني كنت مستنيها مستني الخطوه دي٬ ويكيبيديا مصري هو مشروع كتابة الموسوعه الحره بالمصري٬ يعني ايه بالمصري؟… يعني بالطريقه اللي المصريين يعرفوا يقروها.
مصر على مر التاريخ كانت مرتع للثقافات و اللغات المختلفه من ايام الفراعنه للرومان لمصر القبطيه لدخول الإسلام و عرب شبه الجزيره –مصر الإسلاميه- و بعدها دخول المماليك و العثمانيين فمحاولات الفرنسيويين لدخول مصر و من بعدهم الإنجليز (انا مش مذاكر تاريخ كويس فمعلش لو الترتيب التاريخي مش دقيق او ناقص) ٬ المهم ان كل الثقافات و اللغات و الحضارات المختلفه دي عدّت علينا و عاشت وسط المصريين لسنين طويله و كلها ساهمت في تشكيل الشخصية المصريه و طبعا اللغه المصريه –لغة كلام الشارع المصري- يمكن لو قولنا اللهجه المصريه نكون ادق ولكن في الآخر المصريه دي هي الطريقه اللي انا بكتب بيها دلوقتي و اللي بنتكلم بيها في الشارع و بنشوفها في منولوجات السينما و التليفزيون.
التأكيد على تواجد اللغه المصريه في العالم الإفتراضي انا بعتبره خطوه مهمه جدا و اتمنى انها تكون خطوه اولى على طريق ترسيخ الشخصيه المصريه و الأدب المصري بكل انواعه٬ اكتر من حد كان شايف ان الويكيبيديا المصري ممكن تعمل تشتيت شويه ان اصلا ويكيبيديا عربيه محتاجه مجهود في ترجمة او كتابة مواضيع كتير فممكن ويكيبيديا مصري تكون تشتيت للمجهود بس انا مش شايف كدا لأني انا مثلا بحب اكتب بالمصري كدا اسهل و بكون مرتاح عن الكتابه بالعربيه الفصحي٬ غير اني متحمس لفكرة التمييز بين الشخصية العربية و الشخصية المصريه.
ويكيبيديا موسوعة حره يعني اي حد ممكن يدخل يكتب فيها اي حاجه هو عارفها٬ في مجموعه من الإلتزامات العامه اللي المفروض تتبعها و انت بتكتب زي انك تكون حيادي و متشهرش بحد و تحاول تذكر مصادر الكلام اللي انت كاتبه٬ انا قررت اني في نهاية كل اسبوع هكون كاتب موضوع عن اي حاجه انا اعرفها و انشره في الويكيبيديا المصريه و اتمنى اننا كلنا نشارك في كتابة مقالات عن اي حاجه احنا نعرفها الحكايه سهله و التسجيل مفتوح من هنا٬ هختم كلامي بمقوله لأبن العبري..
“اللي ميعرفش لغته ميعرفش الهدف من وجوده”
من غير كلام كبير عن اللغة العربية والإنفصال عن معرفش إيه …
أنا هاسأل إيه الإضافة أو إيه الهدف من موسوعة معلومات باللهجة المصرية
بشكل آخر إيه الهدف من وجود موسوعة معلومات لا يفهمها سوى المصريين
إيه الحاجة الحلوة فى كده
أنا شخصياً بالعن كل اللغات لما أحتاج معلومة ملاقيهاش فى ويكبيديا العربى اللغة اللى أنا بافهمها وألاقيها فى الموسوعة الإنجليزية اللى مبافهمهاش
أنا متفهم لوجود أدب باللهجة المصرية
إعلام باللهجة المصرية
وكلامى معاك دلوقتى باللهجة المصرية
أنا أعرف اللهجة المصرية كويس وعارف هدف وجودى
إنما إيه الكويس فى إن المعلومات تتكتب بيها
إيه الفرق بين إضغط هنا وكليك هنا
إيه السبب اللى يخلينى أشارك فى الموسوعة ديه ومشاركش فى الموسوعة العربية
وإيه السبب اللى يخلينى لما أحتاج معلومة أروح أدور عليها فيه مش فى الموسوعة العربية
انا بعتقد انها اولا تعتبر ترسيخ للشخصيه المصريه يعني اثبات و فرض للشخصيه المثريه بنديها حقها يعني و دي في حد ذاتها فايده
ثانيا هتسهل على المتطوعين انهم يكتبوا
يعني انا كان صعب عليا قوي اني اكتب اي مقال في ويكيبيديا عربي ولكن دلوقتي انا شايف انه اسهل على كتيييييييييييييير و اوفر في الوقت و المجهود اني اترجم اي مقال من الأنجليزي او اكتب اي مقال جديد بالمصري اسهل و دي فايده كمان
هو فى قواعد للغة إسمها المصرية؟
ولا يعنى الناس ح تكتب كتب قواعد للغة المصرية من الأول؟
طب بلاش… ناويين تخلوها لغة مصرية سواحلية ولا نوبية؟ ولا بدوية؟
وبلاش كل دا…
حد سمع عن لغة بريطانية ولغة أمريكية؟ فى حاجة فى الدنيا اسمها لغة إسترالية مثلا؟
طيب.. ترضى يبقى فى لغة مغربية ولغة تونسية ولغة قطرية؟
ماشى سيبك من كل دا ودا… الكتب العلمية مثلا مثلا ناويين تدخل فى الخطة وتتمصر؟
بصراحة يا يسارى.. انا بحترم شغلك جدا.. انما فى النطقة دى.. مستغرباك فوق الوصف
عشان بجد.. واسمح لى اقول.. دا كلام مش مظبوط ابدا
واحده واحده كدا و هوضح وجهة نظري
اولا في حاجه اسمها الإنجليزي الأمريكي و انجيلي المملكه المتحده
و ممكن تشوفيهم على الورد عندك و الفرق بينهم فعلا كبير و بيفرق في كلمات و قواعد كتير
ثانيا اللغه المصريه دي مش بدعه او حاجه جديده دي اللغه اللي المصريين بيتكلموها من زمن كبير تقريبا بعد الغزو العربي لمصر لأن قبلها كنا بنتكلم اللغه القبطيه و بعدين اختلطت القبطيه بالعربيه و تأثرت بالأنجليزي و الفرنساوي و اصبحت لغه مستقله عن اللغه القبطيه و العربيه و هي بتختلف في قواعد اللغه عن اللغه العربيه الفصحي انا مش خبير لغوي ولكن دا بيكون واضح لما تقري اعمال بالعاميه المصريه و اعمال بالعربيه الفصحى
و ممكن تشوفي الرابط دا بيوضح مجموعه من قواعد اللغه المصريه
اللغه المصريه هي اللي بيتكلم بيها تقريبا ساكني القاهره الكبرى و الأسكندريه و كتير من المحافظات غير الصعايده و الفلاحين اللي بيتكلواها ولكمن بلهجتهم الخاصه وهي اصلا نتاج لخليط الساحل مع النوبه و الصعيد هي نتاج المزيج دا الثقافات المختلفه اللي كونت الشخصيه المصريه
بذمتك مش مكسوف و أنت كاتب “مصر مرطع”!
طبعا حكاية المصريين كلهم يعرفوا يقروها دي خدعة، لأنك أول ما تكتب “أنديل” بالألف و الهمزة (أو من غير همزة لأنها صعبة و متعبة) تبقى زعلت منك سكان نصف مساحة مصر ال بينطقوها زي ما انت يا قاهري بتنطق “جنديل” مع أنك لو كتبتها كدا بالجيم فهم هينطقوها حاجة ثالثة.
يعني أنا و أنت مبرطعين و احنا بنكتب لهجتنا القاهرية اللطيفة دي..ماشي.
لكن كمان تقول أنها لغة، و أن هي دي دونا عن غيرها من لهجات حملة الجنسية المصرية هي “اللغة المصري”..كدا تبقى وسعت منك شوية يا حسنين.
الموضوع يعتمد على مفهومك “لمصر و المصريين”. يعني إذا هتعتبر زي ما كان تاريخيا أن “مصر” Egypt Proper هي وادي النيل بس و أن الصحراوات شرق و غرب و النوبة و سينا دي كلها مستعمرات و سكانها أجانب و لهجاتهم مش مصرية، فكدا نبقى حلينا جزء من المشكلة و نشوف لنا صرفة في الصعايدة و الفلاحين و سكان الدويقة السيس دول. أما الاسكندرانية ال لهجتهم مختلفة كثير عن القاهريين – مش زي ما أنت بتقول – و أقرب للهجات غرب شمال أفريقيا فهم أصلا مش طايقينا احنا القاهريين العفشين و عاوزين يستقلوا من زمان. (“يستقلوا” يعني “يستألوا” يعني “يستجلوا”)
سلم لي بقى على الدولة القومية المصرية ال أنت عاوز ترسّخ شخصيتها.
في نقاط ثانية كمان غير موضوع الدولة القومية المصرية ال أنا الحقيقة مش مهتم بها قوي.
مممممممم
انا اتخربط .. اتلخبط
بس بالمنظر دا و بناء عن كلامك يبقى البلد دي مفيش حاجه تلخص مزيج الخلطه دي
ماهو احنا كلنا بنتأثر في بعض على مر الوقت يعني البحراويه بأثروا على الصعايده و الصعايده بقالهم يجي 50 ولا 60 سنه بيجوا العاصمه و بيختلطوا و يصاهروا من القاهريين و اثروا فيهم و تأثروا منهم
انت لخبطني يا أحمد يا غربيه
هحاول افهم اكتر ولا اشوف حاجه تفهمني و ارد عليك او اصحح مفاهيمي :S
واضح إن حماستك لمصر هى اللى خلتك تدافع عن ويكيبيديا مصرى..
بس انت ماردتش على سؤالى فى النص
“ناويين تخلوها لغة مصرية سواحلية ولا نوبية؟ ولا بدوية؟”
فى القاهرة بيقولوا عليها طماطم.. وفى وجه بحرى بيقولوا قوطة..
فى فرق مابين الأعمال اللى كتبت بالعامية المصرية والفصحى، دا حقيقى.. لكن بص على أعمال الأبنودى مثلا.. دا فى بعض كلمات بيفرد لها هامش عشان نفهم هو عايز يقول ايه بلغة أهل بلده و”كناياتهم” فى أبنود
وخلى بالك من كلمة كنايات قوى على فكرة..
يعنى كذا مرة ألقط أهلى فى البلد بيضحكوا عشان قلت شئ بعفوية قاهرية وهو له مفهوم تانى عندهم والعكس صحيح..
لما تتعمل حكاية تمصير اللغة، مش بعيد لو تراث القرى المصرية يندثر عشان القاهرواية فى إديهم التكنولوجيا والمال.. ودا للأسف اللى بيحصل فعلا من الراديو والتلفزيون .. وحتى ما يكتب بالعامية.
فكرتنى لما روحت النوبا جابولنا مترجم عشان أنفهم بيقولوا ايه
فى المغرب أو الجزائر لما بيتكلموا فرنسى ، تقريبا معظم طبقات الشعب بتفهم بيقولوا ايه
جرب إنت تتكلم بالإنجليزى فى مكان عام..
بس سيبك من كل دا.. أعتقد إنك عارف كل اللى قلته بس ناسيه
الفرق بين اللغة الإنجليزية البريطانية والأمريكية -على حد علمى- مش ضخم.. مش بالدرجة اللى يخلى الأمريكى مايفهمش البريطانى كتابة.. الا فى اللكنة أو اللغة الدارجة..
cockney language
و على حد علمى برضو، بتستخدم زى العامية عندنا كدة، فى الحوار داخل النص وبين قوسين.. يعنى مش لغة
وخلى بالك إنك بتتكلم على نفس المستوى
cockney and not formal language.
ودى بتختلف حتى مابين المناطق فى بريطانيا والدول الإسكندنافية
غير إنك لازم تخلى فى بالك – لو ناوى تقارن – إن أمريكا طول عمرها زى الشريك المخالف مع أوربا.. وكمان إن تاريخ أمريكا مش زى بريطانيا.. أمريكا من 200 سنة ومبينية على أجناس مختلفة من العالم.. فطبيعى يكون فى إختلاف
(جرب تقارن نطق الإنجليزى بين مصر والهند.. أو مصر والسعودية)
على فكرة، دا أكتر تعليق أنهكنى عقليا كتبته فى مدونات، مع إنى مش خبيرة لغة ولا عندى ما يأهلنى أناقش على مستوى علمى
بى اس: على فكرة هى “مرتع” مش مرطع
وأنا أقول فى حاجة غلط فى الكلمة لحد ما أحمد غربية أكدها
بى اس تانية: متأكدة إنه مش ح يفوت كتير قبل ما تنضم لصفوف الرافضين للفكرة إنت كمان
أه نسيت أقول لك..
داحنا يارجل ملناش زى رسمى رغم تاااااااريخنا الطوييييل
تجى تقول لى لغة
أنا هاموت من الضحك
بكم الحياة أفضل
أنعشونا و فرفشونا
http://www.facebook.com/group.php?gid=52654683425&ref=nf
كعادة أى يسارى, يقف فى وجه التقدم. لا يحق لك أن تعارض هذه الجملة إن أنكرت الرأى الآخر المؤيد بالإعتراف باللغة المحكية المصرية.
الإعتراف باللغات المحكية له فوائد كثيرة; منها تسهيل القضاء على الأمية.
الإصرار على احتكار المعرفة على المتعلمين باللغة العربية, يحتكر معه أيضاً القراءة و الكتابة على متقنين اللغة العربية.
كل لغات العالم, بما فيهم العربية, مرت بمراحل توحيد لكى تكتب.
من الطبيعى لأى لغة أن توحد على أساس أشهر لهجة لها و أكثر لهجة انتشارا.
جملة اعتراضية: أستغرب! لماذا تعتبرون المتحدث بالعربية هو المثقف؟ لماذا لا يكون المتحدث, باللغة الإنجليزية أو الفرنساوية أو أية لغة أجنبية, مثقف؟
لماذا نصر على تمجيد المبادئ الإمبيالية و الإستعلائية التى تعتبر التحدث بلغة ليست محلية أو خاصة بالطبقة المتعلمة, رقى؟
لماذا لا نسهل على أهالى بلدنا التعليم ولا نحتكر القراءة و الكتابة على من يتقن اللغة العربية القياسة (الفصحى كما تحبوا أن تسمونها)؟