أخيراً المدوّنة رجعت تشتغل المشكله كانت ان وقت التجديد السنوي للإستضافة فات و الفلوس مدفعتش فكانت النتيجه ان مدونتي و مدونة مو الطاهر –مواطن مصري واخد على قفاه سابقاً- و مدونة اسد و مجموعة من المواقع و المدونات المستضافه من قبل نفس مقدم الخدمه وهو محمد عادل –ميت-٬ عادل أمن الدوله خاطفه من يوم 21 نوفمبر اللي فات و محدش من المحامين او اهله حتى قدر يحدد مكانه!!
محمد غير كونه مدوّن و ناشط٬ ربطني بيه شغل بصفتي مصمم مواقع و بصفته مبرمج٬ و من واقع تعاملاتي معاه كان انطباعي الأول عنه انه لسه صغير يعني غير ملتزم بمواعيده مبيفرقش بين الشغل و ارتباطاته و بين الهزل او قعدات البورصه اللي كان بيعشقها… ولكن الإنطباع دا امر طبيعي لأن محمد عمره 19 سنه تقريبا٬ من قبل اعتقاله بليله كنت بتصل بيه مليون مره عشان استعجله لتسليم احد المواقع اللي تأخر عن الإنتهاء من برمجتها ولكنه مكانش بيرد لحاد آخر اتصال مني بيه الساعة تقريبا 1 الضهر و مردش كالعاده بعدها تليفونه اتقفل و هو كان بيعمل الحركه دي كتير!!
عرفت بعدها انه اتخطف و محدش عارفله طريق.. التعليق الوحيد فعلا على اعتقال امن الدوله لمحمد عادل و التعتيم عن مكان اعتقاله هو اللي قاله محمد العدل في فيلم رشّه جريئة “عيل صغير عمل صوابعه كدهه مسدس وقال لصاحبه طريخ طراخ… قام صاحبه طاوعه وساق له فيها وعمله ميت واهله قالوا ده طخه طخ!!”
ولا عزاء للطفولة!!
يمكنك متابعة آخر الأخبار عن محمد عادل من موقع الحريه لعادل٬ و ممكن تربط له عن طريق الكود…
Is there any information about this subject in other languages?