في 6 ديسمبر اللي فات كان في مجموعه صغيره من المتظاهرين إعتراضاً على سوء الأحوال الإقتصاديه في اليونان نتيجة للأزمه الإقتصاديه العالميه و كان بيحاصرهم مجموعه من مكافحة الشغب اليوناني, واحد من ظباط مكافحة الشغب اطلق 3 اعيره ناريه تقريبا بهدف تفرقة المتظاهرين, ولكن واحد من الأعيره الناريه دي أدّى لوفاة الكسندر -15 سنه- اللي مكانش مشترك في المظاهره ولا حاجه.

من يوم 6 ديسمبر و ليومنا دا اثينا و اليونان كلها مش بتنام, مظاهرات و مسيرات طول الليل و النهار عشان الكسندر طبعا اتنين ظباط تم ايقافهم و حبسهم و منتظرين المحاكمه خلال ايام, المظاهرات انطلقت من اتينا ضد جرائم الشرطه و اروبا كلها تحركت لمساندتهم, مظاهرات و مسيرات في ايطاليا و اسبانيا و فرنسا و لندن خرجت لمساندة المتظاهرين في اتينا, المظاهرات مكانتش بس عشان الكسندر اللي اتقتل ولكن موت الكسندر كان فقط الشرار اللي اشعل الناس امام النظم الرأس ماليه في اوروبا, خرجوا يعبروا عن الضيق لتدني مستوى المعيشه في اوروبا بعد الأزمه الإقتصادية.

الكلام بقى اللي حايشه و مكسوف اقوله… احنا بيتقتل عندنا كام الكسندر في السنه؟ 10 ولا 20؟ الكسندر دا مش زي محمد على مبروك -15سنه- اللي اتقتل في انتفاضة المحله 6 ابريل اللي فات و بطلق ناري من قوات مكافحة الشغب؟ ولا محمد -12 سنه- قتيل شها اللي اتعذب بالكهربا لحاد ممات؟!!, ولا قتيل اسوان عبد الوهان عبد الرازق -41 سنه- اللي اتقتل وهو نايم في بتهم من غير اي ذنب… الأمثله كتير و انا متأكد اننا في مصر بيتقتل مش اقل من 20 الكسندر على مدار السنه بين القتل بأعيره ناريه او بعد تعذيب.

ولكن ايه اللي بيحصل؟ بنتنرفز يوم اتنين وبعدين ننسى نخضع اكتر, نطاطي اكتر, تتقتل فينا النخوه اكتر, الحالة الإقتصاديه في اثينا لايمكن بأي حال من الأحوال تكون اصعب من مصر بس هما انتفضوا و احنا لأ!!! انا مش قادر اوصف حالة الخضوع و البرود اللي بقينا فيها, ولا احنا اصلا كشعب معتادين على الخضوع و النخوه هي اللي شئ جديد علينا؟!!! انا خايف اوصف اللي احنا فيه لأنه ملهوش غير وصف واحد… اننا كلنا ارخص من طوب الأرض ولا لينا ثمن لأن احنا رخصنا نفسنا!!!

المجد لإنتفاضة اليونان, تحيّه للحركات الشيوعية اليونانيه, الأنركيه التحررين و كل فرد يوناني يساهم بجسده للدفاع عن الإنسان, عن النخوه!!!