انهارده و انا في الشغل كلمني مالك … ايه يا واد يالا هتقابلني في المكان الفولاني عشان الشغل و عايزك تبيض وشي , بص هو عند المعبد اليهودي في شارع عادلي … اوك يا مالك انا نص و اكون عندك … انا مكنتش اعرف المعبد اليهودي دا فين الصراحه اعرف انه في وسط البلد بس فين معرفش ولا عارف شارع عادلي دا اللي هو فين اصلا لأني بنسى إسم شارعنا اصلا !!!
المهم قولت اعتمد على اني اسأل الناس في الشارع و اكيد هوصل بعد ميتوهوني شويه كالعاده المهم وصلت عند سينما مترو كدا و بدور على حد اسأله جيه حظي مع واحد بدقن و حالق الشارب , قولت قشطه هسأله ..
- لو سمحت هو المعبد اليهودي منين ؟
- نعم ؟ (و ملامح وشه اتغيرت) انت عايز ايه عند المعبد ؟
- انا عايز المعبد اليهودي هو فين ؟
- لا قولي انت عايز المعبد ولا مكان جمبه ؟!!!
- يا عم هي حدوته انا عايز المعبد نفسه بقى ( وبدأت اقفش و اجهز لأني فهمت انه هيعيش فيها دور المجاهد)
- لأ لو المعبد يبقى مش هقولك يا حلو !!!
- نعم يعني انا لو يهودي انت مش هتقولي المعبد بتاعي فين ؟
- ولا كنت هكلمك اصلا !!!
- ليه يا عم هما اليهود اللي في مصر كانوا عملولك ايه , و بعدين دول كتابين زيهم زيك يعني دينك بيقولك تؤمن بدينهم و بنبيهم و تودهم دول كتابين ياعمي …
- لا ماهو دينهم دا اتلغى … الإسلام نزل ولغى الكلام دا و بعدين دول كفره بيعبدوا الأصنام و الدال على الفعل كفاعله…
- الإسلام نزل لغى؟؟؟ ايه العبثيه اللي انت بتفكر بيها دي هو ربنا دا فوق بيلعب بينزل دين عشان يلغي اللي قبله ؟ و بدأت فعلا اتنرفز و بضاني ورمت , المهم انا عايز دين ام المعبد اليهودي رايح اصليلي ركعتين هناك هتقولي ولا لأ ؟!!!!
- لأ مش هقولك
بصيتله بمنتهى الإحتقار و القرف و كان نفسي اسبله ميت مله بس مشيت عشان كنت متأخر … طبعا انا لما حكيت لمالك قالي انت غلطان انك تناقش الناس دي انت كنت شخرت و سبيت الدين وضربته و مشيت ( طبعا دا مالك جريندايزر اللي عارف كويس قوي انه قادر يعمل دا 
)
ان ليا كام تعليق كدا برضوا كنت عايز اقولهم بس كنت مستني الوقت المناسب عشان اقولهم و اهو جيه , المسلمسن هم مش ايد ربنا في الأرض يعني مش منحقهم يصدروا احكام على آخرين لأنهم مش على دينهم , يعني مش عشان انا على اي دين آخر او ملحد تصدر امر بينك و بين نفسك انك لازم تقاطعني و يمكن تقتلني لو جتلك الفرصه , ربنا اللي المسلمين نفسهم مؤمنين بيه شايف الملحد و عابد الأصنام و عابد البقره و سايبه يعبد البقره و يحب الصنم و يصلي للشمس … يبقى انت يا عبد يا معفن لأنك جيت في الدنيا لاقيت ابوك و امك مسلمين فبقيت مسلم او مسلم عن قناعه يبقى انت سيف الله في الأرض , لأ … انت تحترم الإنسان لأنه انسان محدش ليه علاقه بديني ولا يعاملني على اساسه لأنه علاقه بيني و بين اللي بعبده او اللي مش مؤمن بيه انا المسؤول عن اختياراتي … بجد الإنسان اللي قابلته دا مقرف و فرحان بدقنه … طيب موقف اتحكالي زمان في حصة دين في المدرسه عن سيدنا محمد :
ان كان في واحد من الكافرين بيه بيروح كل يوم و يشخ قدام عتبة بيته كل يوم , و في يوم سيدنا محمد خرج من البيت ملقاش حاجه فراح يزوره في البيت و يسأل عليه لحسن يكون تعب و فعلا كان مريض …
دا سلوك النبي اللي المفروض انه بيؤمن بيه الشخص اللي كنت بتكلم معاه انهارده … ديني علاقه شخصيه مش منحق حد انه يسألني عنه او يتعامل معايا على اساسه !!!
بقي رايح المعبد تصلي ركعتين
الواد دا لو عنده شويه مخ كان عرف انك بتعيش عليه ووفر الخطبه العصماء دي بس هوا شكله فرحان بدقنه جديد
الموقف الي انت بتحكيه دا بتاع الرسول عليه الصلاه والسلام حصل فعلا
كان جاره يهودي وبياذيه دايما وكان بيرمي قذورات وزباله وبلاوي كتير قدام بيته كل يوم الصبح لحد ما قعد يومين ميعملش كده فراح وسال عليه ولاقاه عيان فبقي يسال عليه كل يوم علشان يطمن عليه
فا اليهودي بقي موش هقلك انكسف ولا انبهر ولا اي حاجه هوا اسلم علي طول
اما بقي موضوع ان الاسلام لغي كل حاجه قبليه فا دي نكته قديمه مفروض كنت تضحك وتقله والنبي يابني محدش قلي كنت فاكر ان مفروض ابقي مؤمن بالي قبليا علشان ابقي مسلم
انت ليه بتشتم فى مواضيعك؟
حسين
يعني انت من كل كلامي ملفتش نظرك غير اني بشتم في مواضيعي ؟
صباح الفل
بس حبيت اوضحلك نقطة مهمة ان احنا اما مثلا بنقول لليهود احنا بنحب سيدنا موسى او المسيحيين ان احنا بنحب العدرا والمسيح فالمفروض انهم يتبسطوا يعني
اصل موسى والمسيح مش بتوعهم يعني واحنا بنحبهم عشان السماحة وكده احنا بنحبهم لانهم انبياء الله
وكمان انا شايف اني اما اقول لواحد مسيحي احنا بنحب المسيح وبنكرمه انه نبي وكده المفروض انه يفرح لانه اصلا شايف اني بشتمه كده لان المسيح الانسان النبي مش المسيح الرب
وبعدين الاسلام مش بيلغي دين ولا حاجة الاسلام مكمل للرسالات السماوية اللي قبله الموضوع كله ان الاسلام بيفرق بين الرسالة الاصلية بتاعة موسى والدين اللي موجود دلوقتي
اعتقد انك فهمت الفرق طبعا
وبعدين معلش بقى الراجل عنده حق في انه يكره يهود مصر بالذات لان دول على قد ما اخدوا من خير مصر على قد ما خانوها في الاخر وكانوا عاوزين يحرقوها بجاز اسود عليهم وعلى اللي جابوهم
وسلام بقى عشان عندي شوية شغل
موقف الاخ ابو دقن طبعا مستنكر , تماما لو كان رده من واحد من غير دقن أو واحد تاني من أي ملة
لكن سؤال دار في بالي : هل لو كان نفس ابو دقن ده جاوبك في اقل من 10 ثواني و قالك على مكان المعبد و بعدين انصرف الى حال سبيله بكل بساطة , هل كنت هتكتب تدوبنه تحكي فيها الموقف بوجهة نظر مخالفة؟؟
مع انه برضه كان هيبقى نفس الشخص طويل اللحية حليق الشارب ذو المظهر المتخلف المثير و الشكل المقرف لكل تحفظاتك المسبقة؟
و بالنسبة لتعليقك الاخير احب بس اوضح مش أكثر
صحيح المسلمين مش ايد ربنا في الارض لكن احنا مأمورين – كمسلمين- باتباع اوامر الله و اجتناب نواهيه و قال رسول الله “من اطاعنى دخل الجنة و من عصاني فقد أبى” و الاسلام هو نظام حياة متكامل
ايضا موقف واحد في الشارع لا يعبر عن موقف دين بأكمله بل هو مردود عليه و بالتبعية لايجوز ان يتم وصف السلوك على انه اسلامي , بل هو سلوك عام و لو التزم الرجل بالسلوك الاسلامي الصحيح ما كان يبقى في مشكلة
من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا