أشارك في إضراب ٤ مايو ولا لأ ؟ السؤال بيفرض نفسه على كل اللي شاركوا في يوم 6 ابريل و لمسوا الروح اللي كانت عند الناس في الشارع … طيب عشان نعرف هنشارك ولا مش هنشارك لازم نعرف جدوى يوم ٦ ابريل يعني الجميع اتفق على ان اليوم كان يوم ناجح و بناءً عليه جدّدوا الدعوه للمشاركة في يوم مماثِل و هو يوم ٤ مايو , مين اللي اتفقوا و لا إشمعنى يوم ٤ مايو انا صراحة معرفش انا كنت هربان يوم ٦ ابريل رجعت البيت ببص على الفيس بوك* لاقيتهم بيقولوا ٤ مايو , طيب انا شايف ان اولاً لازم نعمل تقييم ليوم 6 ابريل و بناء عليه نقرر مشارك او غير مشارك تاني …
زي ماقلت اتفَق الجميع على ان يوم ٦ ابريل كان يوم ناجح و حقق بعض الاهداف و انا موافق على ان اليوم كان ناجح يمكن البعض كان راسم في خياله إن في يوم ٧ ابريل حسني مبارك هيسيبلنا الحكم و احمد عز هيقولنا خدوا الحديد ببلاش بس احنا مش مسؤولين عن اصحاب الآمال المغفَّلة …
يوم ٦ ابريل في اصل الدعوه في للمشاركة فيه كانت لمساندة اضراب عمال مصانع المحله الكبرى اصحاب الاضراب الاصلي و الدعوه تطورت من مجرد مسانده لعمال المحله في إضرابهم مع المشاركة الواسعه من فئات مختلفه تحمست للمشاركه في اليوم ليس فقط لمساندة عمال المحلة بل ايضاً تعبيراً عن غضبهم من إرتفاع الاسعار و سوء الحالة الإقتصادية , يوم ٦ ابريل بصراحه كنا كلنا في حاجه له مع قلة التحركات في الشارع في الفتره التي سبقته و دا كان واحد من الاسباب التي جعلت الدعوه تتسع بشكل لم يكن من الممكن السيطرة عليه و انا هنا مش قصدي الفيسبوك و المجموعة اللي ضمت ليلة الاضراب مايفوق ال ٥۰ الف مشارك لكني لمست الانتشار في الشارع وسط طبقات مصدر الاخبار الوحيد لها هو برنامج البيض بيضك … !!
بإختصار واحد من اعظم النجاحات اللي حققها إضراب يوم ٦ ابريل كانت الروح اللي اتخلقت في اليوم دا و الحماسة اللي كانت عند نسبة مش قليلة من الناس في الشارع , و طبعاً كان في عيوب كتير في يوم ٦ ابريل و بعض المشاكل في التحضير لليوم .. بس نرجع لنقطه مهمه أن الاصل في التحرك في هذا اليوم كان إضراب عمال المحله لأنه و كلنا نعلم ذالك كان الاكثر جديَّة بعيدا عن إضراب القاهرة الذي كالعادة تمثل في وقفة على سلالم نقابة المحامين .
الإضراب هو التوقف عن العمل بصورة مقصودة وجماعية وهدفه الضغط على رب العمل من قبل الأجراء. وتسمى أيضا اضرابات الحوادث التي تؤلف توقفا عن العمل غير أجراء كإضراب التجار وإضراب أعضاء المهن الحرة وإضراب الطلاب وإضراب المواطنين عن دفع الضرائب.
هذا هو تعريف الإضراب كما ورد في الموسوعة الحرة شروط نجاح الإضراب كانت متوفرة في يوم ٦ ابريل لذلك كانت المشاركة فيه واجب , الاضراب كان بالأصل عند عمال المحلة و حاولنا نشر الفكره لكي يكن إضراب عام في كل ميادين مصر تم ذلك بنسبه و إن كانت صغيره و لكن مجرد حدوث المشاركة في وجهة نظري هي نجاح في ظل السلبية التي تسيطر على المصرين . أما عن يوم ٤ مايو فأنا إرى انه مجرد إستغلال لروح ٦ ابريل في محاولة لتكرار التجربة و لأسباب أخرى ايضاً أحدها تزامن يوم ٤ مايو مع اسود يوم في تاريخ البشرية يوم ميلاد المسخوم له مبارك !!!
اينعم انا كنت أحد المشاركين في العام الماضي بالإحتفال بهذا اليوم الأسود الذي تزام مع فرح ابن المسخوم على ديجه بس دا كان يوم عبثي كدا و انتهى بأننا سبنا الأمن واقف في ميدان طلعت حرب و قعدنا على قهوة البورصه نشيِّش لكن هذه نقرة و هذه نقرة أخرى …
من الآخر انا مش مع إضراب ٤ مايو…
* الفيس بوك منذ ظهورة و بداية انتشاره في مصر كنت من المقتنعين تماماً انه واحدة من نتائج ثورة الإتصالات و انه قد يلعب دور مهم في نشر خبر او دعوة لحدث او نشر خبر بطريقة واسعة و سريعة و لكن ان يتحول لحركة نضالية اسمها الفيسبوكيون فدا بصراحه و لامؤخذه خراء و إحنا مش ناقصين .. !!!
جابر صديقى
نظرا لارتياحى الشديد بمكنتك الجديدة فاسمحلى انى ابقى انطلك كل شوية
بص يا معلم
انا معاك فى كلامك عن اضراب 6 ابريل و كمان اضراب 4 مايو
دا غير
انى شخصيا مش متفائل اوى بنتيجة 4 مايو
من سنتين احنا استهلكنا الوقفات
وعملنا مسيرات
ورجعنا نستهلك المسيرات
فعملنا اعتصامات
وطبعا كان لازم نستهلك الاعتصامات بردو
علشان ندخل فى مرحلة الاضرابات
ودائما … اول مظاهرة و اول مسيرةو اول اعتصام بيبقوا دايما الاجمل والاروع
هنا ممكن تفهم قلقى الشخصى من يوم 4 مايو
يعنى احنا هانستهلك فكرة الاضراب بردو وهاتبقى عادة صباحية انك تلاقى كل يوم الصبح دعوة للاضراب العام لغاية ما الناس تتبضن وترجع تنام تانى
لكن فى نفس الوقت ما اقدرش اقول انى مش مع اللى حاصل \بالرغم من ايمانى بعدم جدواة
لكن لو مسكنا الموضوع من اوله هانلاقيه بيتصاعد
يمكن تصاعد بطىء ماحدش حاسس بيه لكن .. تقدر تقول احنا كنا فين وبقينا فين لو عملت مقارنة بسيطه بين 6 ابريل 2008 و اى 6 ابريل تانى من كام سنه عدت
عاوز اقول ان فيه هدف ممكن يكون استراتيجى .. طويل
عمليه خلخله بطيئة وخلع ضرس
معاك بردو ان الفيس بوك نتاج ثورة اتصالات … لكن علشان المصطلح يبقى عملى لازم الناس تتعود على ان كل ما ثورة الاتصالات زادت كل ما سقف الحرية لازم يعلى
وهنا تيجى افكار الفيس بوك المجنونة واللى انا شايف انها ممكن تكون مفيدة على الاقل فى التمرين على التمرد من الاسقف المنخفضة
ياه انا رغيت كتير اوى معلش اعذرتى
يا ايوب باشا انت تنور المكنه مكنتك يا رفيق
كلامك صح انه استغلال متكرر للأفكار ولكن الرأي المعارض بيقول ان الاستغلالات دي طبيعيه و ان شغل الشارع و التحركات بيكون نتيجة حركات متكرره و دا كان رأي مالك لما سألته عن 4 مايو بعد يوم 6 ابريل … وجهة نظر بس المشكله ان المره دي في مسؤولية كبيره شويه هي ان في نسبه مش قليله من المتحمسين للمشاركه شباب جدبد يمكن 6 ابريل كان اول تحرك سياسي حاضروه و انا معتبر ان الشباب دول مسؤولين من كل اللي بيدعوا لتحرك 4 مايو لأنه و ببساطه لو تم إحباطه و لم يحقق نجاح اكبر من يوم 6 ابريل الشباب دي هتصاب بإحباط و هنفقد مصداقيتنا و الشارع يرجع ينام تاني
عشان كدا بقول ان التحركات خصوصا وسط الروح الموجوده حاليا لازم تكون بناء عن تخطيط جيد و كلام مسؤول مش زي جعجعة حزب العمل مثلا ..
حزب ايه ؟؟؟
مش واخد بالى ؟؟؟
bous ya gabor ana ma3ak tamaman fe kalamk el zareef da
bas ana bardo ma3 est3′lal rou7 6th of april law dah ele ha7rak el nas wey5alehoum ye2olo la2a we ye5alou shbab modern ye7seo bele araf ele 7asal fel balad yeb2a leeeh la2 !!??!! u no well that am against the 4th of may, bas haydoor fe eih law adrabt fe3lan we marou7tesh el gam3a?? msh momken yefeed we yewa23 el borsa??? allahou a3lam
ayoub
حزب العمل يا ايوب انت مسمعتش عن الانتفاضه بتاعتهم و لا ايه ؟
دول قالوا انهم هيحاصرو قصر الرياسه و كلام اهطل كدا انت عارف شغل العمل و اللي هتكلم عنه قريب
Mariam Bennt Omran
يا نت عمران و هو انا قولت انني ضد استغلال الروح و اعادة و تكرار المحاولات
بس انا اتمنى ان الحكايه متكونش تحركات عبثيه عشان منخسرش الشباب الجديد دا اللي بسهوله ممكن يفقد الامل في التغيير …