خطاب مسجل بعلم الوصول إلي سيد الناس سيدي رايس المطحونين
السيد \ محمد حسني مبارك
امما بعد
نعلمكم يا ريس ان إحنا شعب فقري ايوه شعب فقري
ونظرا لأن النعمة فاقت حدها… ولأننا مش قدها … ولأن فعلا انجازاتك فوق طاقتنا نعدها … ولأننا غرقنا في جمايل مستحيل حنردها … نستحلفك نسترحمك نستعطفك … نستكرمك ترحمنا من طلعة جنابك حبتين … عايزين نجرب خلقة تانية ولو يومين,
اسمع بقى إحنا زهقنا من النعيم … ونفسنا في يومين شقا عايزين نجرب الاضطهاد ونعوم ونغرق في الفساد
بيني وبينك حضرتك دا شعب فقرى مايستحقش جنتك …
أنا عارفه شعب ماينفعوش إلا شارون وبلير وبوش … عايز يجرب الامتهان ويعيش عميل للأمريكان
بيمد غازه” لإسرائيل ويومين كمان ويمد نيل … أهو يعنى نشرب ميه واحدة … ندوب في بعض ماء وماء وماء
ونفض سيرة الانتماء
وبلاها نعرة وطنطنة … تبقى البلاد “مستوطنة ” (متسلطنة بالسرطنة) … إيه اللي خدناه م الكرامة والإباء ,
حبة خطب وكلام … كلام إحنا راهننا على النظام … ورضينا بخيار السلام … (بخيار)حنسد عين الشمس بيه
علشان مايطلعش النهار … ويطلع لمين؟
حبة معارضة مغرضين؟
وحسب بيان السلطة شلة مأجورين؟
ياعم فضك سيرة وارضى بقسمتك …
دا شعب مش فاهم أكيد يالا اطرده من رحمتك
وإن كنت غاوي الحكم خليك مطرحك …
حاغطس واقب وأعود بشعب يريحك
راضى وعمره مايجرحك, أخرس ومايسمعش, وأعميلك عينيه … مش كل قرش يبص فيه … مايقولش لأ

وختاما تحياتي للمدام و الابناء

Posted By: GABOR ®